Hai kaun Zimmedaar (Nazm)
(A nazm on "Gujarat")

hai kaun zimmedaar iska aakhir ye kis ki zimmedaari hai
apni hi kotaahiyon ka sabab tang nazari ye hamaari hai
har simt gunjte hai naare har lahzah khauf se bhaari hai
insaaniyat mit gayi dilon se ab gham-o-nafrat taari hai

bacche maaN-baap se chutay
kitnon ke hai ghar lutay
dil sabhi ke hain tutay
apnon se apne bhi ruthay

hai kaun zimmedaar iska aakhir ye kis ki zimmedaari hai
'aahinsa'ki is sarzameen par tashaddud aaj bhi jaari hai
harsoo qatl-o-ghaarat ka hai manzar chaarsoo maaramari hai
akhlaaq ne to kab ka dam toda ab ikhlaas ki bhi baari hai

nazariyaa apna badalna hoga
is maahol se nikalna hoga
waqt ke saath chalna hoga
aaj gire kal sambhalna hoga

hai kaun zimmedaar iska aakhir ye kis ki zimmedaari hai
jism tuta huva bujhti nigaahen dilon maen beqaraari hai
goya aas na ho umeed paas na ho zindagi se bezaari hai
is maen nahi jeet kisi ki faqat aadmiyat hi haari hai

haq ka muhaafiz hi jab haq se muqar jaiy
ta'assub ki god maen insaaf neend bhar jaiy
fariyaad yateem bekaso ki jab be-asar jaiy
aise maen kya kare, kahaan koi bashar jaiy

hai kaun zimmedaar iska aakhir ye kis ki zimmedaari hai
mulk ke rahbaron ki koi dekhe kaisi ghaflat-shuaari hai
naadim hai har fard ka chehra hind ki yeh sharmsaari hai
lekin voh hain ke ab bhi jinko 'kursi' zyaada pyaari hai

nafraton ke baazar maen pyaar ka sikka chalta nahi
in be-chiraghaan galiyon maen ek diya bhi jalta nahi
har shaks hai sehma sehma sa, baher koi nikalta nahi
jab zameer hi so gaya ho phir ehsaas machalta nahi

hai kaun zimmedaar iska aakhir ye kis ki zimmedaari hai
farq insaanon maen jo kare laanat voh siyasat-daari hai
mehfooz nahi koi iski girift se kaisi ye fitnakaari hai
bakhsha nahi jisne 'gandhi' ko kya bisaat meri tumhaari hai

hai kaun zimmedaar iska aakhir ye kis ki zimmedaari hai
apni hi kotaahiyon ka sabab tung nazari ye hamaari hai


--------------------------------------------------------------------------------

kotaahiyon----shortcomings/deficiencies
tangnazri---narrowmindedness
samt----direction
lahzah----moment
tashaddud---violence
harsoo----everywhere
qatl-o-ghaarat---killings and looting
akhlaaq----morality
ikhlaas----civility
maahol---atmosphere
beqaraari---restlessness
bezaari---sick of
muhaafiz----protector
ta'assub---partisan attitude
yateem---orphan
bashar----human being
rahbar---leader
ghaflat-shuari----negligence
naadim----shamefaced
fard----individual
hind----country
sharmsaari---shame/loss of face
be-chiraghaan----without light
zameer---conscience
laanat---despicable/to be despised
siyasatdari----politics
mehfooz----safe
girift---clutch
fitnakaari---mischevious propaganda
bisaat---value